1Ki 12 | MEU | STEP | Rehoboam na Sekem ela, badina be Israel taudia iboudiai na Sekem ela, pavapava ai bae halaoa totona.

1 Kings 12

Solomon natuna Rehoboam

1 Rehoboam na Sekem ela, badina be Israel taudia iboudiai na Sekem ela, pavapava ai bae halaoa totona. 2 Ieroboam Nebata na harina e kamonai; badina be ia na dounu Aigupto ai, King Solomon e heautania negana ai e lao henia gabuna ai. Bena Ieroboam na Aigupto amo e lou. 3 Bena idia ese ia iboirina e hesiai; bena Ieroboam bona Israel hegogona idoinai ema, Rehoboam e hereva henia, eto, 4 Tamamu ese emai maduna e hametaua. Taunabunai, harihari tamamu ena hesiai ilao-henina aukana bona ena maduna metauna ai latamai ai na ba haharaḡaia; bena ai ese oi isiaimu baia lao heni. 5 Ia na eto, Ba raka oho, dina toi heḡereḡerena, ma ba lou mai dekegu ai. Taunabunai, taunimanima na e raka oho.

6 Bena King Rehohoam na tau badadia, tamana Solomon maurina ai ia vairanai e giniva taudia, ida e henega bou, e nanadaidia, eto, Emui hahealo be dahaka egu ai? Ini taunimanima na ede baina haere henidia toma? 7 Idia ese e haere henia, eto, Hari dina ai ini taunimanima edia hesiai tauna ai boma lao, isiaidia boma lao heni, bona ba haere henidia negana ai hereva namodia boma gwaurai; bena idia na oiemu hesiai taudia ai baela hanaihanai. 8 To una hahealo tau badadia ese e henia na ia ese e dadaraia; bona eregabe taudia, ia ida e vara isi hebouva bona ia vairanai e giniva taudia, ida e henega bou. 9 Ia ese e nanadaidia, eto, Emui hahealo be dahaka? Ini taunimanima ese vada e hamaorogu, eto “Tamamu ese ai latamai ai vada e atoa madunana na ba haharaḡaia”. Ede baita haere henidia toma? 10 Bena hari ia ida e vara isi hebou taudia ese e haere henia, eto, Hari vada e hamaoromu, eto “Tamamu ese emai maduna e hametaua a oi ese ba haharaḡaia”, taudia na ini ba haere henidia toma, baoto “Lau imagu kwakikwakina maraḡina udunana ese tamagu mamuna udunana na e hereaiamu; 11 taunabunai, tamagu ese maduna metauna na umui latamui ai e atoa, a lau ese ma baina hametaua, bona tamagu ese hekwadi varodia amo e hahisimui, a lau ese doadoa amo baina hahisimui”.

12 Taunabunai, dina ihatoina ai, Ieroboam bona taunimanima iboudiai na Rehoboam dekena ema, hanua pavapavana ena hereva heḡereḡerena, eto “Dina ihatoina ai dekegu ma baoma”. 13 Bena hanua pavapavana ese taunimanima na e gwau daḡe henidia, tau badadia edia hahealo e dadaraia, 14 bona eregabe taudia edia hahealo heḡereḡerena ai e hereva henidia. Eto, Tamagu ese maduna metauna na umui latamui ai e atoa, a lau ese ma baina hametaua; bona tamagu ese hekwadi varodia amo e hahisimui, a lau ese doadoa amo baina hahisimui. 15 Taunabunai, hanua pavapavana ese taunimanima eredia se kamonai; badina be ini kara na Iehova ese e havaradia, ena hereva, Ahia tau Silono ese Ieroboam Nebata e hamaorolaia herevana, na baine hamomokania helaoreana.

16 Israel taudia iboudiai na e itaia, hanua pavapavana ese idia eredia se kamonai; bena idia ese hanua pavapavana e haere henia, eto,

Ai ahumai be dahaka David enai a?
Asi ahumai ta Iese natuna enai.
Israel e, emui kalaga ba lou henidia!
David e, emu ruma ba gimaia!
Taunabunai, Israel taudia na edia kalaga e lou henidia. 17 A Rehoboam ese Israel taudia Iuda hanuadia ai e nohova na e lohiadia.

Basileia na e haheparara

18 Bena Rehoboam ese Adorama, e haḡaukaradia taudia biagudia, na e siaia; a Israel taudia iboudiai ese nadi amo e hodoa mase. Bena King Rehoboam na ena kariota ai e gui haraḡa, Ierusalem baine heau lao eto. 19 Taunabunai, Israel idoinai ese David garana e gwau edeede henidiamu ema bona ina dina. 20 A Israel taudia na e kamonai Ieroboam vada e lou mai, bena idia ese e boiria, hebou lalonai; bena Israel idoinai pavapavana ai e halaoa. Ta na David garana murinai se raka, Iuda iduhuna taudia mo sibodia.

21 Rehoboam na Ierusalem ai e kau negana ai, ia ese Iuda iduhuna taudia iboudiai bona Beniamina iduhuna taudia e haboudia, tuari taudia mai goadadia domaga-ta gerebu-taurahani; ^{▼▼Domaga-ta gerebu-taurahani = 180,000.} Israel taudia bae tuari henidia bona basileia na Solomon natuna Rehoboam bae henia lou eto. 22 A Dirava ena hereva na Dirava ena tau ladana Semaia dekenai e kau, eto, 23 Rehoboam Solomon, Iuda pavapavana, bona Iuda bona Beniamina iduhudia taudia, bona taunimanima oredia iboudiai na ba hamaorodia, baoto 24 “Iehova na ini e gwau tomamu: Basiola, varavaramui Israel taudia na basio tuari henidia; ta ta emu ruma emu ruma ba lou lao, badina be ina na lauegu amo e vara”. Taunabunai idia ese Iehova ena hereva e hakala henia, edia ruma e lou heni, Iehova ena hereva heḡereḡerena.

Ieroboam ese Israel e hakererea

25 Bena Ieroboam ese Sekem e hadaia, Efraim ororodia ai, unuseni ai e nohova. Bena unu amo e raka lasi, Penuel e haginia. 26 Bena Ieroboam na lalona ai eto, Ina basileia ese David garana baine lou henia. 27 Ini taunimanima ese Iehova ena dubu Ierusalem ai bema lao henia, boubou ḡaudia ihahelaḡadia totona, idia lalodia ese edia lohia Rehoboam, Iuda pavapavana, bema lou henia; bena lau bae alagu mase, bona Rehoboam, Iuda pavapavana, bae lou henia.

28 Taunabunai, hanua pavapavana na hahealo e tahua, bena boromakau natudia laulaudia ruagold amo e karadia. Bena ia ese taunimanima e hamaorodia, eto, Ierusalem vada o lao henia davana. Israel taumui e, Aigupto tanona amo e hakaumui lasi diravadia bini a itadia. 29 Bena ia ese ta Betele ai e haginia, ma ta be Dan ia. 30 Bena ina na kara dika ai ela; badina be taunimanima ese ta e lao henia Betele ai, ma ta ilao-henina totona e laova bona Dan ia. 31 Ia ese danu dubu haida e haginidia atai gabudia ai, bona hahelaga taudia e duanaidia taunimanima iboudiai lalodia amo, dia Levi taudia mo lalodiai.

32 Ieroboam ese danu aria e gwauraia, hua ihataurahanina dinana ihagwautaimana ai bae karaia, Iuda ai e karaiava ariana heḡereḡerena; bona boubou ḡaudia e hahelaḡadia, ihaboulaina patana latanai. Betele ai danu unu e kara toma, hari boromakau natudia laulaudia, e karadia ḡaudia, na e boudia. Bona hari atai ai e karadia gabu-helaḡadia edia hahelaga taudia na ia ese Betele ai e hanohodia. 33 Ihaboulaina patana Betele ai e karaia na hua ihataurahanina dinana ihagwauta-imana ai e dae henia, ia sibona ese lalona ai e haeroa huana ai; aria ta e gwauraia Israel taudia edia, bona ihaboulaina patana e dae henia, muramura mai bonana igabuna totona.